Galatians 6

1. ¹Britheren, if a man be occupied in ony gilt, ye that ben spiritual, enforme ye such oon in spirit of softnesse, biholdinge thi silf, lest that thou be temptid.
2. ²Ech bere othere chargis, and so ye schulen fulfille the lawe of Crist.
3. ³For who that trowith that he be ouyt, whanne he is nouyt, he bigilith him silf.
4. ⁴But ech man preue his owne werk, and so he schal haue glorie in him silf, and not in an othere.
5. ⁵For ech man schal bere his owne charge.
6. ⁶He that is tauyt bi word, comune he with him that techith hym, in `alle goodis.
7. ⁷Nyle ye erre, God is not scorned;
8. ⁸for tho thingis that a man sowith, tho thingis he schal repe. For he that sowith in his fleisch, of the fleisch he schal repe corrupcioun; but he that sowith in the spirit, of the spirit he schal repe euerelastynge lijf.
9. ⁹And doynge good faile we not; for in his tyme we schal repe, not failinge.
10. ¹⁰Therfor while we han tyme, worche we good to alle men; but most to hem that ben homliche of the feith.
11. ¹¹Se ye, what maner lettris Y haue write to you with myn owne hoond.
12. ¹²For who euere wole plese in the fleisch, `this constreyneth you to be circumcidid, oonli that thei suffren not the persecucioun of Cristis crosse.
13. ¹³For nether thei that ben circumcidid kepen the lawe; but thei wolen that ye be circumcidid, that thei haue glorie in youre fleisch.
14. ¹⁴But fer be it fro me to haue glorie, no but in the crosse of oure Lord Jhesu Crist, bi whom the world is crucified to me, and Y to the world.
15. ¹⁵For in Jhesu Crist nether circumcisioun is ony thing worth, ne prepucie, but a newe creature.
16. ¹⁶And who euere suwen this reule, pees on hem, and merci, and on Israel of God.
17. ¹⁷And heraftir no man be heuy to me; for Y bere in my bodi the tokenes of oure Lord Jhesu Crist.
18. ¹⁸The grace of oure Lord Jhesu Crist be with youre spirit, britheren. Amen.

Public Domain