Galatians 5

1. ¹Stonde ye therfor, and nyl ye eftsoones be holdun in the yok of seruage.
2. ²Lo! Y Poul seie to you, that if ye ben circumcidid, Crist schal no thing profite to you.
3. ³And Y witnesse eftsoones to ech man that circumcidith hym silf, that he is dettour of al the lawe to be don.
4. ⁴And ye ben voidid awei fro Crist, and ye that be iustified in the lawe, ye han fallen awei fro grace.
5. ⁵For we thoruy the spirit of bileue abiden the hope of riytfulnesse.
6. ⁶For in Jhesu Crist nether circumcisioun is ony thing worth, nether prepucie, but the bileue that worchith bi charite.
7. ⁷Ye runnen wel; who lettide you that ye obeyede not to treuthe?
8. ⁸Consente ye to no man; for this counsel ys not of hym that hath clepid you.
9. ⁹A litil souredowy apeirith al the gobet.
10. ¹⁰I trust on you in oure Lord, that ye schulden vndurstonde noon other thing. And who that disturblith you, schal bere dom, who euere he be.
11. ¹¹And, britheren, if Y preche yit circumcisioun, what suffre Y yit persecucioun? thanne the sclaundre of the crosse is auoidid.
12. ¹²Y wolde that thei weren cut awei, that disturblen you.
13. ¹³For, britheren, ye ben clepid in to fredom; oneli yyue ye not fredom in to occasioun of fleisch, but bi charite of spirit serue ye togidere.
14. ¹⁴For euery lawe is fulfillid in o word, Thou schalt loue thi neiybore as thi silf.
15. ¹⁵And if ye bite, and ete ech othere, se ye, lest ye be wastid ech fro othere.
16. ¹⁶And Y seie you in Crist, walke ye in spirit, and ye schulen not performe the desiris of the fleisch.
17. ¹⁷For the fleisch coueitith ayens the spirit, and the spirit ayen the fleisch; for these ben aduersaries togidere, that ye don not alle thingis that ye wolen.
18. ¹⁸That if ye be led bi spirit, ye ben not vnder the lawe.
19. ¹⁹And werkis of the fleisch ben opyn, whiche ben fornicacioun, vnclennes, vnchastite, letcherie, seruice of false goddis,
20. ²⁰witchecraftis, enmytees, striuyngis, indignaciouns, wraththis, chidingis, discenciouns, sectis, enuyes,
21. ²¹manslauytris, dronkennessis, vnmesurable etyngis, and thingis lijk to these, whiche Y seie to you, as Y haue told to you `to fore, for thei that doon suche thingis, schulen not haue the kyngdom of God.
22. ²²But the fruyt of the spirit is charite, ioye, pees, pacience, long abidyng,
23. ²³benygnyte, goodnesse, myldenesse, feith, temperaunce, contynence, chastite; ayen suche thingis is no lawe.
24. ²⁴And they that ben of Crist, han crucified her fleisch with vices and coueytyngis.
25. ²⁵If we lyuen bi spirit, walke we bi spirit; be we not made coueytouse of veyn glorie, stirynge ech othere to wraththe, or hauynge enuye ech to othere.
26. Verse 26 is not in this translation.

Public Domain