Romans 2

1. ¹Wherfor thou art vnexcusable, ech man that demest, for in what thing thou demest anothir man, thou condempnest thi silf; for thou doist the same thingis whiche thou demest.
2. ²And we witen, that the doom of God is aftir treuthe ayens hem, that don siche thingis.
3. ³But gessist thou, man, that demest hem that doen siche thingis, and thou doist tho thingis, that thou schalt ascape the doom of God?
4. ⁴Whether `dispisist thou the richessis of his goodnesse, and the pacience, and the long abidyng? Knowist thou not, that the benygnyte of God ledith thee to forthenkyng?
5. ⁵But aftir thin hardnesse and vnrepentaunt herte, thou tresorist to thee wraththe in the dai of wraththe and of schewyng of the riytful doom of God,
6. ⁶that schal yelde to ech man aftir his werkis;
7. ⁷sotheli to hem that ben bi pacience of good werk, glorie, and onour, and vncorrupcioun, to hem that seken euerlastynge lijf;
8. ⁸but to hem that ben of strijf, and that assenten not to treuthe, but bileuen to wickidnesse, wraththe and indignacioun, tribulacioun and angwisch,
9. ⁹in to ech soule of man that worchith yuel, to the Jew first, and to the Greke;
10. ¹⁰but glorie, and honour, and pees, to ech man that worchith good thing, to the Jew first, and to the Greke.
11. ¹¹For accepcioun of persones is not anentis God.
12. ¹²For who euere han synned without the lawe, schulen perische withouten the lawe; and who euere han synned in the lawe, thei schulen be demyd bi the lawe.
13. ¹³For the hereris of lawe ben not iust anentis God, but the doeris of the lawe schulen be maad iust.
14. ¹⁴For whanne hethene men that han not lawe, don kyndli tho thingis that ben of the lawe, thei not hauynge suche manere lawe, ben lawe to hem silf,
15. ¹⁵that schewen the werk of the lawe writun in her hertis. For the conscience of hem yeldith to hem a witnessyng bytwixe hem silf of thouytis that ben accusynge or defendynge,
16. ¹⁶in the dai whanne God schal deme the priuy thingis of men aftir my gospel, bi Jhesu Crist.
17. ¹⁷But if thou art named a Jew, and restist in the lawe, and hast glorie in God,
18. ¹⁸and hast knowe his wille, and thou lerud bi lawe preuest the more profitable thingis,
19. ¹⁹and tristist thi silf to be a ledere of blynde men, the liyt of hem that ben in derknessis,
20. ²⁰a techere of vnwise men, a maistir of yonge children, that hast the foorme of kunnyng and of treuthe in the lawe;
21. ²¹what thanne techist thou another, and techist not thi silf? Thou that prechist that me schal not stele, stelist?
22. ²²Thou that techist that me schal `do no letcherie, doist letcherie? Thou that wlatist maumetis, doist sacrilegie?
23. ²³Thou that hast glorie in the lawe, vnworschipist God bi brekyng of the lawe?
24. ²⁴For the name of God is blasfemed bi you among hethene men, as is writun.
25. ²⁵For circumcisioun profitith, if thou kepe the lawe; but if thou be a trespassour ayens the lawe, thi circumsicioun is maad prepucie.
26. ²⁶Therfor if prepucie kepe the riytwisnessis of the lawe, whethir his prepucie schal not be arettid in to circumcisioun?
27. ²⁷And the prepucie of kynde that fulfillith the lawe, schal deme thee, that bi lettre and circumcisioun art trespassour ayens the lawe.
28. ²⁸For he that is in opene is not a Jew, nether it is circumsicioun that is openli in the fleisch;
29. ²⁹but he that is a Jew in hid, and the circumcisioun of herte, in spirit, not bi the lettre, whos preisyng is not of men, but of God.

Public Domain